तुळजापूर : तुळजा भवानी मातेच्या चैत्री यात्रेस गुरूवारी तारीख 18 मध्यरात्री गर्दी होऊन चेंगराचेंगरीची परिस्थिती निर्माण झाल्याने मंदीरातील गोमुख तिर्थ आणि कल्लोळ तिर्थ प्रशासनाने भाविकांना अंघोळीसाठी बंद करण्याचा निर्णय मंदीर समितीने घेतला. सुदैवाने कोणताही अनर्थ घडला नाही. 

तुळजाभवानी मंदीरात गुरूवारी रात्री अकरा वाजण्याच्या सुमारास मंदीर बंद झाल्याने भाविक बाहेर काढण्यात आले. तेच भाविक पुन्हा मंदीर रात्री एक वाजण्याच्या सुमारास उघडणार असल्याने महाद्वारातून मंदिरात कल्लोळ तिर्थ, गायमुख तिर्थ कुंड या भागात आले. गायमुख तिर्थ आणि कल्लोळ तिर्थ या भागात प्रचंड गर्दी झाल्याने चेंगराचेंगरी सदृश परिस्थिती निर्माण झाल्याने पोलीस आणि मंदीर प्रशासनाने गर्दीवर नियंत्रण आणले. तसेच गायमुख तिर्थ आणि कल्लोळ तिर्थ कुंड प्रशासनाने पूर्णपणे बंद केले. तुळजा भवानी मंदीरात चैत्र पौर्णिमेच्या मध्यरात्री गर्दी अचानक वाढेल याचा प्रशासनास अंदाज आला नाही. त्यामुळे ही गंभीर परिस्थिती निर्माण झाल्याचे बोलले जात आहे. कोणतेही अनुचित प्रकार घडला नाही. प्रशासनाने काळजी घेतली. 

तुळजाभवानी मंदीरात गुरूवारी रात्री मंदीर बंद झाल्या नंतर बाहेर आलेले यात्रेकरू गायमुख तिर्थ आणि कल्लोळ तिर्थ या भागात आले. त्यामुळे तेथे असणारे पाणी आणि दलदल निर्माण होऊन चेंगराचेंगरीची परिस्थिती निर्माण होऊ नये म्हणून गौमुख आणि कल्लोळ तिर्थ कुंड बंद केले. - एन.जी. झांपलवाड, तुळजा भवानी मंदीर समितीचे सरव्यवस्थापक.